عامل الدليفري المفصول من شركة بريدفاست: فصلوني علشان العميل مسمعش كلمة العفو.. وهددوني بوصل أمانة| بث مباشر
تصدر الشاب شهاب أبو سلامة، البالغ من العمر 26 عاما، عامل دليفري بشركة بريدفاست، تريند مواقع التواصل الاجتماعي خلال الساعات الماضية، بعد فصله من عمله بسبب تقدم أحد العملاء بشكوى ضده.
وقال شهاب عامل الدليفري، إنه وصل أوردر لأحد العملاء يوم 13 فبراير، وخلال عمله طلب منه المدير أن يترك العمل وأخبره أنه مفصول، مضيفا: كنت في نص اليوم ولسه بكمل شغلي قالي سيب الشغل وامشي، وأنا كنت فاكر إن كدا شفتي خلص وخرجت لأني معملتش أي مشاكل مع حد، بعدها سألني عملت مشاكل مع حد من العملاء قلتله لا، وقالي أنت متحول للتحقيق تاني يوم.
وأضاف شهاب عامل الدليفري: قلت في التحقيق إن اللي حصل إن العميل لما وصلتله الأوردر قالي شكرا قلتله العفو، بعدها لقيته بيحقق في وشي بشكل غريب وفتح الشباك وقعد يبصلي تاني، بس أنا مركزتش ومشيت.
وتابع عامل الدليفري المفصول أن الشركة أخبرته أن العميل تقدم بشكوى ضده لأنه لم يسمع كلمة عفوا، أو إنها لم تعجبه، مضيفا: الشركة مضتني على إخلاء طرف واستقالة، وقلتلهم إن اللي حصل دا ظلم ليا وأنا معملتش حاجة لكنهم هددوني بوصل أمانة لو اتكلمت وقولت اسم الشركة.. والوصل دا خاص بتسليم العهدة المالية ليس أكثر.
