جثمانه ظل 24 ساعة بالبحر.. أسرة الغواص محمد نبيل ضحية شركة الغطس في العين السخنة: ابننا راح بسبب الإهمال

كشفت والدة الغطاس محمد نبيل، الذي لقي مصرعه في العين السخنة، نتيجة إهمال شركة O2 Diving للغطس، في صيانة وتصليح معدات الغطس واستخدام أكسجين ملوث، تفاصيل جديدة عن الواقعة.

وقالت والدة الغطاس محمد نبيل إن نجلها يعمل في تلك الشركة منذ أشهر قليلة، وخلال تلك الفترة حدث معه الكثير من الحوادث، مضيفة: في الشهر الأخير حصل مع ابني 3 حوادث ورا بعض، وقالي إن الشركة قفلوا عليه الهواء مرة واحدة وهو تحت الميه وإما قولتلهم بتعملوا إيه قالولي نسينا إنك تحت.

وتابعت والدة الغطاس محمد نبيل: كان كل ما يسافر يجيلي بإصابة بسبب إهمال الشركة، وكان بيقولي إن الشركة بتستخسر تغير المعدات وتعملها صيانة.. ابني كتوم جدًا وصعب يحكيلي حاجة لكن كان بيشتكي دايما من إهمال الشركة.

وأضافت والدة الشاب محمد نبيل: ابني طول عمره بيحب السباحة ومن أول ما اشتغل مع الشركة دي وأنا كنت حاسة إنهم مش مضبوطين.. ابني يتيم الأب من وهو عنده 9 سنين ونصف.. كان دايما بيقولي إن معدات الشركة قديمة وبايظة ومتهالكة.

واستكملت والدة الغطاس محمد نبيل: ابني كان بينزل الميه آخره نص ساعة لكنهم سابوه 24 ساعة تحت الميه.. أنا ربيته أحسن تربية وكان هيخطب وبدور له على عروسة.. ابني راح بسبب الإهمال وعايزة حقه.