سيدة تستغيث بسبب إهمال طبي بأحد المستشفيات: دخلت أعمل عملية خرجت بعجز في العمود الفقري | بث مباشر

استغاثت سيدة تدعى أم محمود، 53 عاما، بعد تعرضها لواقعة إهمال طبي داخل أحد المستشفيات، حيث دخلت المستشفى لإجراء جراحة وخرجت بعجز في العمود الفقري.

وقالت أم محمود، إنها كانت تعاني من انزلاق غضروفي، وأخبرها الطبيب أنها تحتاج إلى إجراء عملية جراحية، وفي تلك العملية حدث خطأ طبي من الدكتور حيث خدش النخاع الشوكي، مضيفة: الطبيب استغل جهلي وقالي مفيش مشكلة في اللي حصل.

سيدة تستغيث بسبب إهمال طبي في أحد المستشفيات

وتابعت أم محمود: خرجت من المستشفى وأنا مش قادرة أحرك رجلي وعندي تقل جامد فيها.. وروحت للدكتور تاني قالي إني محتاجة أركب مسامير في ضهري ومحتاجة عملية علشان دي منجحتش، وبالفعل عملتها لكن ضهري قعد 40 يوم مفتوح وفيه خرّاج، وإما سألتهم قالولي دا بكتيريا من الجرح.

وأضافت أم محمود، أنها أصبحت عاجزة تماما عن الحركة، وذهبت لأطباء آخرين لكنهم رفضوا تبني حالتها، موضحة: قالولي مش هنتحمل مسئولية حد، ورفضوا حالتي.

واستكملت أم محمود: مش بقدر أخدم نفسي ولا أعمل أي حاجة، وكل ما أروح للدكتور يقولي محتاجة أشعة وتحاليل وعملية تاني، لكن مبقتش أثق فيه، ومش معايا تكاليف العلاج ومحتاجة حد يساعدني.