أيوب صاحب فيديو الطفاية دي: صحيت من النوم لقيت نفسي تريند.. وبصرف على 5 بنات

قال أيوب، صاحب فيديو الطفاية دي الشهير: «أبويا سابلي 3 بنات واتوفى، فاضطريت إني أقعد من التعليم وأشتغل عشان أعول مصاريفهم، ووالدتي كانت بتشتري تحف وتبيعها، فقولت لها أنا أعرف أعمل التحف دي، وعملت المشروع دا.. وفي يوم وليلة صحيت لقيت نفسي تريند والكل بيتكلم على الطفاية دي».

وأضاف أيوب، لـ كايرو لايف: «إحنا ناشرين الفيديو دا من سنة، ولكن اللقطة اللي عجبت الناس، هي تكرار الطفاية دي 3 مرات، ولما أخويا قالي إني طلعت تريند على الحاجة دي مكنتش مصدق».

صرح أيوب: «أنا بعد التريند دا حبيت كلمة الطفاية دي، بسبب تفاعل الناس، ومبسوط جدا إني رسمت الضحكة في وجوه الناس، وإني أعرض المنتج بتاعي وفي نفس الوقت أقول شعر يفرح الناس»..

وعن عمله قال أيوب: «أنا بصنع أنا وأمي وأخواتي في بيتنا، ولما لقيت في إقبال على الشعر، بقيت أحط الكراسة جنب مني وإما يخطر على بالي كلام بكتبه، وربنا كرمني بعد ما خسرت حلمي الأول وطلعت من الثانوية العامة، لكن الحمد لله على ما وصلت له».

وكان قد تدول مقطع فيديو عبر مواقع التواصل الاجتماعي لكلمات كررها بائع في قطار نجع حمادي المتجه إلى أسوان، قائلا: «الطفاية دي.. الطفاية دي.. الطفاية دي»، ليرد عليه الركاب بلكنة صعيدية: «مالها الطفاية دي يابو عمو».