بائع البليلة بطنطا: بيجيلي زبائن من الجيزة وبني سويف ومكسبي بسيط جدًا

قال بائع البليلة رضا عبد المقصود، والذي يقف بعربة البليلة في ميدان سعد زغلول بمنطقة ستوتة بمدينة طنطا، في محافظة الغربية، إنه يعمل في ذلك المجال منذ نحو 10 سنوات.

وكشف رضا بائع البليلة، عن سر إقبال الزبائن عليه من محافظات الجمهورية المختلفة ومنهم الجيزة وبني سويف، حيث قال: السر في تقوى الله، أنا بتقي الله في كل حاجة بعملها، والمكسب بيبقى بسيط جدًا، وأول ما فتحت طبق البليلة كان بـ 7 جنيه، ودلوقتي ببيعه بـ 15 جنيه.

وتابع حديثه قائلًا: أنا بعمل الشغلانة دي عشان أرضي الناس حبايبي، وأنا عامل لنفسي معدل معين كل يوم، لا بزود ولا بنقص، والحمد لله الزبائن بتزيد كل يوم وبقفل بدري.

أما عن طبيعة يومه في العمل، قال بائع البليلة: أنا بقوم الصبح أجيب المكسرات، والمكسرات بتاعتي بتيجي يوميًا طازجة، وبستخدم لبن جاموسي طبيعي وبنتي وبنت أخويا بيساعدوني في رص حاجة الشغل من بليل، والصبح ببدء أسوي، وبعدين بفتتح آخر النهار.

كما أضاف رضا عبد المقصود: أنا مابفتحش غير في الشتا، والشتا دا طبعًا بتاع عشاق البليلة، وزبائني معروفين بيبقوا ولاد منطقتي وأصحابي، وبيجيلي زبائن تقولي إحنا جايين ليك من الجيزة وبني سويف.