عم يشعل النيران في ابن شقيقه.. ووالدة الضحية: اتخانق مع اللي طفى النار وقاله سيبه يموت

شهدت منطقة حدائق القبة بمحافظة القاهرة، واقعة إشعال رجل النيران في إبن شقيقة، بسبب خلافات عائلية. 

قالت شقيقة الشاب المتوفي على يد عمه: أخويا جات له مكالمة من حد بيقوله عمك نزل يافطة المحل بتاعك وبيكسر في المحل، واخويا عشان ميعملش مشاكل مع عمه متكلمش معاه، لكن أخد الموبيل وبدأ يصور التلفيات اللي حصلت في المحل.

وأكملت شقيقة الضحية حديثها: حاول عمي يتخانق معاه ويختلق المشاكل أكتر من مرة، ويوم الواقعة قاله انت بتصور اللي انا عملته في المحل طب استنى عشان تصورني وأنا بولع فيك.

وأشارت شقيقة المجني عليه، إلى أن أساس الخلاف بين المجني عليه وعمه المتهم، بسبب محل المجني عليه، موضحة: عمي كان رافض إن أخويا يأجر المحل، على الرغم إن المحل في بيت ورثة، وأخويا بيدفع الإيجار. 

وقالت شقيقة أخرى للمجني عليه: أنا كنت في بيتي، لقيتهم اتصلوا بيا بيقولولي عمك ولع في أخوكي، ماستوعبتش اللي حصل وجريت لأخويا في المستشفى، ولما سألته ليه ماهربتش منه قال أنا مش مستوعب إن عمي يولع فيا.

وعن حالة زوجة المجني عليه، وأطفاله، قالت شقيقة الضحية: أولاده لسه عارفين النهارده إنه مات، بنته الكبيرة عندها 3 سنين، فضلت ماسكة صورته وتقول وحشتني يا بابا.

وقالت والدة الضحية: أنا بطالب بالإعدام، لعم أولادي، أنا لما شفت ابني في المستشفى كان هيجيلي شلل، ازاي يعمل كده لإن ده إنسان بيكره نفسه، وقال اللي طفى ابني سيبه يموت. 

أما عن تصرفات الجاني، فحسب شهادة الشهود العيان، أنه اعترف أنه الذي أشعل فيه النيران، بالإضافة أنه تشاجر مع الشخص الذي ساعد ابن شقيقه في إطفاء نيرانه، قائلًا: طفيته ليه كنت تسيبه يموت.