أول رد من حسن شاكوش بعد وقفه نهائيًا.. والتفاصيل الكاملة لأزمته مع نقابة الموسيقيين
أعلن الفنان هاني شاكر، نقيب المهن الموسيقية سحب ترخيص مغني المهرجانات حسن شاكوش بشكل نهائي دون رجعة.
وقال شاكر، في أحد اللقاءات الإعلامية: الغلط اللي غلطه ده أنا واحد من الناس والمجلس معايا كلنا، وقررنا سحب ترخيصه تماما ونهائيا، لأن الحقيقة إحنا مش ناقصين في الوسط الفني هذه النوعية من الفن، هذه النوعية الغريبة والعجيبة اللي احنا بنشوفها في الفن النهاردة، بناقص حسن شاكوش.
وأضاف نقيب الموسيقيين: المشكلة كبيرة وخطيرة، وعلى قد اللي اتعمل ده؛ ما اتعملش في أي حتة، مش بس في مصر، يطلع يغني غنوة إباحية على المسرح، ويخلي الجمهور يشاركه غنائها.
حديث الفنان هاني شاكر كان المقصود به الأغنية التي غناها حسن شاكوش، ردًا على زميله رضا البحراوي، بعد الخلافات التي نشبت بينهما في الساحل الشمالي، عندما كان من المقرر أن يغني رضا البحراوي في الحفل أولًا، لكن صعد حسن شاكوش ليغني، وأصر على مغادرة فرقة رضا البحراوي وبدأ بينهم شجار؛ مما جعل حسن شاكوش يوجه لهم إشارات خارجة، وردت الفرقة عليه، وتبادلوا السباب على خشبة المسرح.
وأوُقف حسن شاكوش وقتها، أما حاليا فتم سحب منه الترخيص بالغناء نهائيًا، وعلق مطرب المهرجانات على قرار نقيب المهن الموسيقية الفنان هاني شاكر، خلال مداخلة هاتفية بأحد البرامج الفضائية: ده أكل عيشي، والفن اللي بقدمه لجمهوري، مليش شغلانة تانية، مشكلتي كانت أنا ورضا البحراوي، ودي أول مشكلة ليا.
أما عن كيفية تصرفه بعد قرار وقفه بلا رجعة، فقال: رضا البحراوي بيشتغل، وقررت الفترة الجايه هاخد قرار مع النقابة، هقعد معاهم ونشوف حل؛ لأن دي أول غلطة كانت ليا.
وأكمل حسن شاكوش: عاوز أرجع أشتغل في بلدي، ما ينفعش أبقى موقوف في بلدي وأشتغل بره مصر، وعندي حفلات خارج مصر في الإمارات وتونس، ولكن ألغيت كل حفلاتي داخل مصر؛ عشان بحترم قرار النقابة.
وحول إمكانية طرحه لأغاني على يوتيوب؛ قال: الواحد مالوش نِفس يعمل حاجة، لكن أنا بسجِّل أغاني، وناوي أنزلها الفترة الجايه، مش هقعد في البيت.
