نجيب ساويرس: الناس مركزة في الفساتين.. لكن صناعة السينما تتم بمهرجان الجونة| فيديو

تحدث رجل الأعمال نجيب ساويرس عن تكريم الفنان محمود حميدة خلال افتتاح الدورة السابعة من مهرجان الجونة السينمائي، كما تحدث عن دعمه لفلسطين ولبنان خلال الحفل.

وقال نجيب ساويرس، في تصريحات لـ القاهرة 24: محمود حميدة قامة، والناس كلها فاكرة إن محمود ممثل بس لكنه مفكر، هو إنسان مطلع، قارئ، له مواقف، له رؤية فلسفية، وإحنا مبسوطين إن إحنا حققنا حلمه، لأن دا مهرجان وهو بيتكرم النهاردة عندنا.

وتابع نجيب ساويرس: الأحداث في غزة ولبنان أثرت علينا، كل النجوم العالميين مجوش المهرجان علشان الحرب، خايفين.. وإحنا ممكن نُهاجم إن إحنا بنعمل مهرجان وأخواتنا عمالين يضربوا، لكن الفكرة مش كدا، الحياة لازم تستمر، والثقافة لها دور كبير والسينما لها دور في إنها تبين حقيقة اللي بيحصل النهاردة، لأن اللي بيحصل في فلسطين دا لازم يوثق ويتعمل عنه أفلام، وكذلك اللي بيتعمل في لبنان.

واستكمل نجيب ساويرس: إحنا مبيهمناش الكلام اللي بيتقال عن مهرجان الجونة، والإعلام في البداية قعد يهاجمه ويركز على الفساتين، لكن صناعة السينما كلها بتتم هنا، وأفراد بيتعلموا صناعة السينما، وفي مخرجين بيدوروا على منتجين، ومنتجين بيدوروا على مخرجين.. أنا حلمي اتحقق في الدورة دي من المهرجان، مبقاش في جزئية في صناعة السينما إلا وكانت موجودة هنا.