استغاثة طالبة إعدادية بالمنوفية بعد تعدي زميلاتها عليها: ضربوني وقالولي هنوريكي أيام سودة | بث مباشر

زعمت طالبة في الشهادة الإعدادية تدعى مايا محمود، مقيمة في إحدى قرى محافظة المنوفية، تعرضها إلى واقعة تعدي بالضرب على يد 3 من زميلاتها خلال أداء أحد الامتحانات.

طالبة تستغيث من تعدي زميلاتها عليها بالمنوفية

وقالت الطالبة مايا إن تفاصيل الواقعة تعود عند بداية امتحانات الشهادة الإعدادية بالمنوفية، حيث تفاجأت بافتعال عدد من الطالبات مشاجرة معها دون أي أسباب.

وواصلت: الطالبات اتخانقوا معايا وكانوا بيشتموني وبيقولوا ألفاظ وحشة جدًا، وكل شوية واحدة منهم تكلمني بأسلوب وحش وكانوا بيزقوني، وعلى قد ما أقدر كنت بحاول أتغاضى عن اللي بيعملوه عشان خاطر الامتحانات.

وأضافت أن الطالبات تعمدن التعامل معها بأسلوب غير لائق، وهذا الأمر ما رفضته فلجأت إلى المعلمين داخل المدرسة حتى تشكو لهم.

واستكملت: المدرسين قالولي كبري دماغك منهم وبالفعل ده اللي عملته، ولكن للأسف الموضوع زاد عن حده وفجأة لقيت البنات في المدرسة في آخر يوم امتحانات بيقولولي خلي بالك دول متوعدين ليكي وعاوزين يضربوكي، وأنا أصلًا معرفهمش ولا هما يعرفوني وإيه السبب اللي خلاهم يعملوا كده معرفش.

وأوضحت الطالبة مايا أن إحدى الطالبات تعدت عليها بواسطة قطعة من الحديد، والباقية تعدوا عليها بالضرب بشكل مبرح داخل المدرسة دون أي أسباب، مختتمة: ضربوني وقالولي إحنا مش طايقينك وهنوريكي أيام سودة، وأنا عمري ما عملتلهم حاجة ولا أعرفهم.