بعد إثارته الجدل.. حمو بيكا يرد على الجدل حول حرمانية الغناء وشائعات الاعتزال | بث مباشر
تسببت تصريحات مؤدي المهرجانات حمو بيكا، في حالة من الجدل وهو ما دفعه للرد على الانتقادات المتكررة بشأن طبيعة الفن الذي يقدمه، خاصة بعد وفاة المطرب أحمد عامر وحذف أغانيه.
حمو بيكا واعتزال الغناء
وقال بيكا في بث مباشر عبر حسابه على فيس بوك: إحنا مبنعملش حاجة غلط.. إحنا بنعمل الحاجة اللي بنحبها.. أما في ناس تانية بتعمل معاصي وفي ناس كتير بتعمل حاجات غلط.. وإحنا مابنجيش على حد، ولا بنضر حد.. وأنتم عارفين مين المؤذي.. وبنحمد ربنا في كل الأحوال.
وردًا على تكرار شائعات اعتزاله، أوضح بيكا أن كل ما تردد ليس له أساس من الصحة، موجهًا حديثه للمتابعين: معرفش ليه الخبر ده منتشر.. أنا مبعملش حاجة غلط، لما مسحت أغاني أحمد عامر عشان هو في ذمة الله، والمفروض ميكنش ليها وجود عندي، إنما قصة اعتزالي المنتشرة دي مش حقيقية، إحنا مش بنعمل حاجة حرام، ده أكل عيشنا، وفي 25 فرد فاتحين بيوت من ورانا.. وربنا هو اللي هيحاسبنا مش أنتم.
وأوضح بيكا أنه لم يصل إلى ما هو عليه بسهولة، بل مر بمشقة وتعب كبيرين، قائلًا: إحنا مش مرتاحين.. إحنا ناس بتتعب ونشقى.. كافحنا وشقينا، واللي إحنا فيه مش من فراغ، أنا اشتغلت حاجات كتير أنت ممكن متتخيلهاش.. وكله بالحلال، الغناء حاجة بنحبها ومش هبطل أغني، ومش هبطل أعبر عني أو عن غيري بطريقتي.
واختتم حديثه بتأكيد التزامه الديني والروحي، نافيًا أن يكون فنه بعيدًا عن القيم: الحمد لله إحنا عارفين ربنا كويس وبنصلي.. ومبنعملش حاجة غلط، وقفنا الشغل وطرح الأغاني احترامًا لوفاة أحمد عامر، لكن مش هنعتزل لأن دي لقمة عيشنا وكلنا أموات ورايحين.
