خالد النبوي يكشف كواليس دخوله عالم الفن: عمري ما فكرت في التمثيل | فيديو
كشف الفنان خالد النبوي خلال ندوته في مهرجان القاهرة الدولي للفيلم القصير، تفاصيل دخوله عالم الفن والتي بدأت بالتحاقه بالمعهد العالي للتعاون الزراعي، مؤكدًا أنه لم يكن يحب هذا المعهد ولم يكن يفكر في دخول عالم الفن.
خالد النبوي يكشف كواليس دخوله عالم الفن
وقال خالد النبوي: دخلت المعهد العالي للتعاون الزراعي وبعدين لاقيت نفسي مش بحبه، وفتحت باب المسرح كان مكتوب عليه حجرة المسرح وأنا معرفش حاجة خالص، كل اللي أعرفه أني بشوف أفلام وبقرأ كتب وبسمع مزيكا، دي كل علاقتي بالفن عمري ما فكرت في التمثيل.
واستكمل النبوي خلال ندوته بمهرجان القاهرة الدولي للفيلم القصير: دخلت المكان لاقيت طرابيزة للبروفات ومجموعة ناس ومخرج قاعد، وأنا مش عارف أن ده مخرج، وقالي اقرأ معانا قولتله، لا أنا جاي أتفرج، فقالي طب أطلع بره فهطلع بره هروح الكافتيريا، فمطلعتش، قالي أنت هتعمل معانا الدور ده، وأنا كنت بطل المسرحية لما روحت ولاقيت الدور بطل المسرحية قولت الراجل ده في حاجة مش مظبوطة، أنا كده هبوظله الدنيا فمروحتش، بعدها شافني في الكافتيريا قالي أنت مجتش ليه أنا هرفدك وهشتكيك، فخوفت كان وكيل المعهد وقتها مش عارف خوفت ليه، مع أني مكنتش بحضر محضرات بشتغل بس، المسرحية كان اسمها القفل، كنت لسه في مرحلة البحث إيه اللي بحبه وهكسب منه لقمة عيشي.
