عاملة هندسة الإسكندرية بعد تنظيم الطلاب ممرا شرفيا لها: مكنتش مصدقة اللي بيحصل | بث مباشر
كشف طلاب كلية الهندسة جامعة الإسكندرية، تفاصيل وكواليس تنظيمهم ممرًا شرفيًا لإحدى العاملات بالجامعة في آخر أيام الامتحانات، وإهدائها باقة ورود تقديرًا وعرفانًا منهم لجهودها التي تبذلها في خدمة طلاب الكلية.
طلاب هندسة الإسكندرية يكشفون التفاصيل
وقال الدكتور وليد عميد كلية هندسة الإسكندرية، إن اللفتة الإنسانية التي شهدتها أسوار كلية الهندسة بعد تنظيم الطلاب ممرًا شرفيًا للعاملة أم هيثم، يعد دليلًا على حصاد الإنسان لما زرعه، مؤكدًا أن العاملة تمارس عملها بأمانة وإتقان، مضيفًا: التكريم اللي حصل ده أكبر دليل على أن الإنسان اللي هيزرعه هيلاقيه، وهي بتشتغل بقلب واللي في القلب بيتنقل بكل حب لأولادنا طول فترة العمل.
وأضاف: هي بتعمل شغلها بحب للمكان وللأولاد والطلاب، ودة اتنقل لأولادنا بشكل تلقائي خلاهم يعملوا مبادرة من تلقاء نفسهم، وإحنا كـ كلية لم نكن على علم أن التكريم الجميل ده هيتم، والتكريم ده بيعكس طبيعة الشعب المصري وحبهم وتقديرهم لبعض.
ومن جانبه، قالت أمل أم هيثم، إنها لم تكن على علم بالتكريم الذي نظمه الطلاب لها، مؤكدة أن بعض الطالبات طلبت منها أن تذهب معها إلى مجموعة من الطلاب الذين يريدون رؤيتها، قائلة: لقيت مريم بتقولي تعالي معايا عايزينك ولقيتهم بيدوني بوكيه ورد ومبقتش عارفة أمشي أزاي أو أعمل أيه، ومكنتش مصدقة اللي بيحصل.
وأضافت أم هيثم: أنا بحبهم زي أولادي وبدعيلهم دايما وقت الامتحانات، واللي عملوه معايا ده لأنهم حسوا بحبي ليهم، وإني بخاف عليهم زي عيالي بالظبط، وعيالي لما شافوا الفيديو كانوا فرحانين.
