نفسي أزور النبي.. مسنة تبيع بلالين بالقليوبية: جوزي رماني في الشارع وشقيت بالحلال على عيالي| بث مباشر

سجلت السيدة فاطمة إسماعيل البالغة من العمر 64 عامًا، مقيمة في محافظة القليوبية، قصة كفاح للبحث عن الرزق الحلال، حيث تخلى عنها زوجها وطردها وأبنائها منذ 25 عامًا، لذلك لجأت لبيع البلالين وبعض الحلوى في الشارع من أجل الإنفاق على أبنائها.

قصة كفاح مسنة في القليوبية

وقالت السيدة فاطمة إن زوجها طردها هي وأبنائها من المنزل منذ نحو 25 عامًا، وعلى الفور لجأت إلى أسرتها وأقامت رفقتهم وكافحت من أجل تربية أبنائها.

وأضافت: جوزي طردني من البيت أنا والعيال عشان كان عاوز يخلص منهم.. وبعدها روحت على بيت أهلي وقعدت أنا وعيالي في أوضة ونزلت أشتغل عشانهم.. وفرشت قدام باب المدرسة بشوية حلويات لحد ما كبرت عيالي.

وأكدت السيدة فاطمة أنها استطاعت أن تؤدي مهمتها مع أبنائها وتولت مسؤولية تربيتهم من خلال عملها البسيط ببيع بعض البلالين والحلوى، معلقة: مافيش حد ساعدني خالص وقدرت لوحدي أربي عيالي لحد ما كبروا وجوزتهم من الفرشة بتاعتي.

كما أوضحت أنها تقيم حاليًا في غرفة بمفردها داخل محافظة القليوبية بعد زواج أبنائها، مختتمة: عايشة لوحدي في أوضة وعيالي كل واحد فيهم اتجوز وقاعد في بيته.. ولسه بشتغل لحد دلوقتي عشان لقمة العيش.. ومش عاوزة حاجة من الدنيا غير إني أزور النبي وأحج.